Wat is God se gedelegeerde gesag?

‘n Christen is iemand wat hom– en haarself onderwerp aan God se gesag vir hulle lewens in Jesus Christus. Dit is die fundamentele betekenis van bekering. Bekering beteken om jou te onderwerp aan God se gesag en die gesag van Sy Woord vir jou lewe. Bekering beteken ‘n omdraai — ‘n omdraai van ‘n selfgerigte lewe na ‘n Godgerigte lewe. Hierdie is ook die geheim van ‘n oorvloedige en Geesvervulde lewe, naamlik ‘n totale onderwerping aan God se Woord, wet, wil en plan vir my lewe.

Ons praat en sing dikwels van algehele oorgawe aan Jesus Christus — “I surrender all” — sonder om die betekenis en implikasie daarvan vir ons lewens te verstaan. Wanneer ek myself ten volle aan Jesus Christus oorgee, beteken dit dat ek my ten volle onderwerp aan God se gesag en die gesag van Sy Woord vir my lewe. Die teenoorgestelde van onderwerping en oorgawe is rebellie. Rebellie is verset teen die gesag van God oor my lewe. Ander woorde vir rebellie is wederstrewigheid, weerspannigheid of eiesinnigheid. In 1 Sam 15:23 en 24 lees ons Samuel se uitspraak  oor Saul en die rede waarom God hom verlaat het. Daar staan: “Maar Samuel antwoord: “Is brandoffers en ander diereoffers (of te wel godsdiens—EG) net so aanneemlik vir die Here as gehoorsaamheid aan sy bevel? Nee, gehoorsaamheid is beter as offerande, om te luister is beter as die vet van ramme. Weerspannigheid is net so erg as die sonde van waarsêery; eiesinnigheid net so erg as die bedrog van afgodery. Omdat jy die woord van die Here verwerp het, het Hy jou as koning verwerp.” (NAV)

Wat egter baie belangrik is om te verstaan, is God se gedelegeerde gesag. Gedelegeerde gesag is wanneer die gesaghebber sy gesag delegeer of afwentel na iemand anders toe. Byvoorbeeld, die polisie en verkeerspolisie is gedelegeerde gesagdraers van die staat. As die verkeerspolisie jou aftrek van die pad af, gehoorsaam jy hulle bevel omdat hulle gesagdraers is van die staat. Jy erken die gesag aan hulle titel en uniform. As iemand jou in privaatdrag konfronteer oor ‘n oortreding van die wet, ignoreer jy dit want hierdie persoon het geen gedelegeerde gesag oor jou nie. In die geval van Saul waarvan ons in die bogenoemde Skrifgedeelte gelees het, was Samuel God se gedelegeerde gesag in sy lewe.

In die Bybelse sin van die woord, beskik ouers oor God se gedelegeerde gesag oor hulle kinders (Kol 3:20), die man oor sy vrou (Ef 5:22-24), die owerhede (regering, werkgewers, skool en kerk) oor sy burgers, werkers, leerlinge en lede (Rom 13:1-7; 1 Pet 2:13-21; 1 Pet 5:1-5), Hierdie waarheid het diepgaande implikasies vir elke kind van die Here.

Dit beteken in werklikheid dat wanneer ek in rebellie, verset of ongehoorsaam is aan God se gedelegeerde gesag oor my, behalwe insoverre die gesag teenstrydig is met die Woord van God, ek in werklikheid in rebellie, verset of ongehoorsaam is aan God. Hierdie waarheid hou ernstige implikasies in vir elke Christen wat hom of haar hieraan skuldig maak.

Die hartseer verhaal van ‘n Christenhuwelik en -gesin wat vernietig is as gevolg van rebellie teen God se gedelegeerde gesag in die huwelik

‘n Sekere Christenman en –vrou, Andy en Helen (nie hulle regte name nie), is met hulle troue deur die Here geroep vir ‘n spesiale taak. Die Here het egter nie hierdie taak aan hulle geopenbaar tot op ‘n veel later stadium van hulle lewe nie aangesien Hy hulle eers moes bekwaam en toerus daarvoor. Albei van hulle het geweet dat daar ‘n spesiale roeping op hulle lewe was, maar nie een van hulle het presies geweet wat dit was nie, tot op ‘n veel later stadium van hulle lewe.

Die Here het intussen aan hulle vier pragtige kinders gegee, twee seuns en twee dogters. Andy en Helen het hulle kinders opgevoed in die vrese van die Here en hulle in die waarheid van die Evangelie gelei. Die tyd waarin hulle kinders groot geword het, was ook die tyd waarin die Here vir Andy en Helen geskool het in die Woord en voorberei het vir hulle roeping. God se skool het hulle somtyds deur diep waters gelei en die mislukking van verskeie projekte was deel van die Here se opleidingskool in hulle lewens.

Gedurende hierdie proses het hulle kinders groot geword en elkeen sy eie besondere geloofstryd begin stry. Baie vrae oor God, die Evangelie en die mislukkings as deel van God se skool, soos hulle pa dit aan hulle verduidelik het, het by hulle ontstaan. Ook Helen het begin deel in die kinders se geloofstryd. Hulle het vrae en vertwyfelinge gehad waarmee hulle begin worstel het en met hulle ma, eerder as hulle pa, begin bespreek het — met Helen se goedkeuring. Saam met Helen het hulle begin twyfel aan Andy se geestelike leiding. ‘As Andy reg was, waarom sou die Here ons dan deur hierdie beproewinge stuur?’, het hulle begin redeneer.

Die gevolg hiervan was dat Helen en die kinders stadig maar seker uitbeweeg het onder die geestelike gesag van Andy as God se gedelegeerde gesag in hulle huwelik en huis. Helen en die kinders het in opstand begin kom teen die geestelike gesag van haar man en hulle pa — net soos Miriam in die woestyn in opstand gekom het teen die gesag van Moses. Dit het aan die Satan ‘n voet in die deur gegee om hierdie gesin te vernietig.

Gedurende hierdie tyd het Helen en die kinders na antwoorde gesoek — antwoorde wat pas by die wêreld en kultuur waarin hulle geleef het. Hulle het die Here aanbid, maar nie Andy se Here wat ‘n algehele oorgawe van hulle lewe vra nie. Hulle het nie meer die stem van God deur Andy gehoor nie, en het hom nie meer erken as God se mondstuk en verteenwoordiger in hulle lewens nie. In die proses is hulle mislei om ‘n ander Jesus en ‘n ander evangelie aan te hang — ‘n maklike evangelie, ’n mensgerigte evangelie waar die Kruis van Jesus Christus op die kantlyn staan. Nie lank daarna nie was hulle huwelik en gesinslewe aan skerwe.

Die tragiek van hierdie verhaal is dat die Here vir Helen en haar kinders aan misleiding oorgegee het omdat hulle hulleself nie meer wou onderwerp aan die geestelike leierskap van haar man en hulle pa wat deur God as Sy gedelegeerde gesag van hulle huis geroep is nie.

God gee sommige oor aan misleiding

Daar is ‘n beginsel in die Bybel wat min Christene verstaan. Dwarsdeur die Ou Testament lees ons dat God Sy volk oorgegee het aan hulle vyande wanneer hulle in ongehoorsaamheid en rebellie volhard.

In Nuwe Testamentiese verband beteken dit onder andere, dat God mense oorgee aan misleiding en die gevolge daarvan wanneer hulle volhard in ongehoorsaamheid, rebellie, en die waarheid van Sy Woord weerstaan.

In 2 Tes 2:9-12 lees ons: “... hy wie se koms is volgens die werking van die Satan met allerhande kragtige dade en tekens en wonders van die leuen en met allerhande verleiding van ongeregtigheid in die wat verlore gaan, omdat hulle die liefde tot die waarheid nie aangeneem het om gered te word nie. En daarom sal God hulle die krag van die dwaling stuur, om die leuen te glo, sodat almal geoordeel kan word wat die waarheid nie geglo het nie, maar behae gehad het in die ongeregtigheid.” (OV. Beklemtoning my eie.) Vers 11 in die nuwe vertaling lees so: “Dit is ook waarom God hulle aan die mag van die dwaling oorgee, sodat hulle die leuen sal glo.” In hierdie verse sien ons dat God mense oorgee aan dwaling. Ons lees van hierdie selfde beginsel ook elders in die Bybel, onder andere in Rom 1:22-25.

Wanneer ek met iemand gepraat en iemand gewaarsku het oor ‘n saak, en daardie persoon volhard om my raad en leiding te verwerp, dan kom ek op ‘n punt waar ek stil word. Ek praat nie meer daaroor nie — ek gee daardie persoon (met hartseer) oor aan sy of haar eie misleiding. Dit is presies hoe God optree teenoor elkeen wat die waarheid en die gesag van die Woord weerstaan. Hy gee jou oor aan jou eie misleiding sodat jy aanhou glo wat jy wil glo — met die tragiese gevolge wat dit vir jou op die langtermyn mag inhou!

Tekens van geestelike verval en agteruitgang

Let op na die tekens van geestelike agteruitgang en verval in jou lewe. Is daar weerstand, opstandigheid, wederstrewigheid, halstarrigheid of rebellie in jou hart teenoor die regering, 'n wetlike gesag, 'n bevolkingsgroep,  jou werkgewer, skool of onderwyser, kerk of leraar, jou man, vrou, of ouers en hulle gesag oor jou lewe -- behalwe in soverre dit teenstrydig is met die Woord van God? Let wel, 'n mens kan met iemand verskil sonder om teen daardie persoon of instansie te rebelleer. Byvoorbeeld, ek kan oor baie dinge met die regering verskil sonder 'n gesindheid van rebellie in my hart.

Die Here stuur dikwels iemand oor ons pad met 'n boodskap of 'n waarskuwing waarvan ons nie hou nie. Dit mag 'n vriend of vriendin, 'n boodskap of artikel, of selfs 'n digitale boodskap of skakel wees. Uit die aard van my bediening skryf ek dikwels oor onderwerpe wat sommige verkeerd opvryf. (Hierdie artikel is 'n voorbeeld daarvan.) Ek kan aan jou talle voorbeelde noem van geliefdes en vriende wat hulle rug op my gedraai en verwerp het as gevolg van 'n artikel wat ek geskryf het.

Oppas dat jy nie dalk jou rug op God draai deur Sy gedelegeerde gesag in jou lewe te verwerp nie! As daar een van die bogenoemde simptome van rebellie in jou lewe manifesteer en jy gee daaraan toe en hanteer dit nie op 'n Bybelse manier nie, wees verseker dat dit na geestelike verval en misleiding in jou lewe sal lei!

‍Die Oplossing

Wat is nou die antwoord? Is daar hoop? As jy tot hiertoe gelees het en besef dat jy dalk een van diegene is op wie hierdie boodskap van toepassing is, is daar hoop! Die oplossing is eenvoudig — jy moet tot bekering kom. Miskien is jy ‘n kind van die Here en jy sê, ‘maar ek het al tot bekering gekom’. Dan moet jy weer tot bekering kom. Bekering is nie iets wat slegs eenmaal in die verlede gebeur het nie. Bekering is iets wat elke keer moet gebeur wanneer die Heilige Gees jou oortuig van sonde in jou lewe. Bevryding van misleiding gaan jou egter iets kos — dit gaan jou ego kos! Jy sal moet erken dat jy verkeerd was. Jesus het in Mat 16:24 gesê: “As iemand agter My aan wil kom, moet hy homself verloën, sy kruis opneem en My volg.”

'n Waarheid wat baie belangrik is om te verstaan is dat die Here dikwels met ons praat deur middel van iemand wat ons as minderwaardig of onbekwaam beskou.

God praat dikwels juis met ons deur iemand wat ons verwerp. Die rede daarvoor is dat Hy ons van ons hoogmoed en eiewaan wil stroop. Die rede waarom die Jode tot vandag toe Jesus Christus as hulle Messias verwerp is juis om hierdie rede. Ons lees in Jes 53:3: "Hy was verag en deur die mense verstoot, 'n man van lyding wat pyn geken het, iemand vir wie die mense die gesig wegdraai. Hy was verag, ons het hom nie gereken nie." (NAV)

Christene hang aan die lippe van welsprekende, materiëel suksesvolle en welvarende leraars, en word so in hulle massas mislei met 'n Ander Evangelie -- absoluut in harmonie met die profetiese Woord ten opsigte van die eindtyd. Is jy dalk een van hulle? Dit het dalk begin toe jy God se gedelegeerde gesag in jou lewe verwerp of misken het.

Lees asseblief hierdie artikel as jy soek na 'n oplossing: Word Vry!